THIL THA TI TURIN KAN LA INTHURUAL THEI

Krismas leh kumthar vuakveta Halpuah hal lo tura inzirtirna leh khapna thupek chuan Mizoram pumah zawm a hlawh the hle a, hmalatu sorkar leh YMA bakah mi tamtak beisei aiin mipuiin an zawm tha niin a lang. Kum kha leh chen kan lo tih thin tawh a nih avangin Kumthar zana halpuah thawm hriattur a awm miah lo kha lehlam zawng chuan a khawhar thlak rum rum zawk a ni, chuti hawp chuan mipuiin zirtirna leh khapna thupek an zawm tha a ni.
Mizoten kum 50 bawr vel atang a Krismas leh Kumhlui thlah zan a piang a halpuah hal ngei ngei tur anga ngaihna thinlung kan lo put tawh hnua, Halpuah leh Halmawi lam tel miah lova kan han hmang thei kha thil chhinchhiah tlak a tling tak meuh a ni tih kan Home Minister chuan a sawi a ni.
Heti taka halpuah hal khapna thupek kenkawhna kawnga hlawhtlinna kan neih theihna chhan hi a hun taka sorkarin hma a lak vang te, Dan leh thupek kengkawhtute thawh rim vang te leh Tlawmngaipawl, YMA te hmalak vang kan ti thei anga, hengte bakah hian Media lama tanla tute bakah mipui te thuawih vang a ni.Kan inthurual chuan thil tha kan ti thei tih chu tun tum Krismas leh kumthar vuakveta halpuah khap chungchangah khan a lang chiang a ni. Thil thalo nia kan pawm tlan vek, sorkar leh mipui pawhin kan duh loh kan khap rem theih loh emaw, kan ven sen loh emaw chungchangah hi chuan kan inthurual tawk lo ti ila a dik awm e.Inlungrualna tel lo chuan khapna thupek ringawt chu a hlawhtling harsa hle a, chuvangin khap ngai tur chi, kan ram leh hnam tana thil thalo hmachhawn tur chuan lungrual taka kan pawm tlan theih zawnga chet lak dan thiam a pawimawh a ni.
Halpuah hal khap hi Zu khap tirh ang deuh khan, a tir lamah hlawhtling viauin lang mahse, a hnu lamah a sawisel pawl lo pawng tial tialin khapna leh inzirtirna kal mek a tibuai thei tho mai a, chuvangin halpuah lamchi khapna dan kalpui zel dan tur pawh hi zirzui a pawimawh khawp mai. Media lamah ngaihdan hrang hrang a darh tan leh ta mek a, chuvangin mipui kaihruaizui thei tur, thu mum mumal tak inkawhhmuhzui a pawimawh deuh deh dawn a, ngaihthah chi niin a lang lo.