INSAWISELNA HMAN TANGKAI THIAM A PAWIMAWH

Fakna awka leh inchawimawina thawm chu hriat a nuam a ni. Politician leh politics-ah phei chuan fakna leh insawiselna hian hmun tam ber a luah ti ila a dik mai awm e. Political party dangin political party dang an infak thawm hriat tur a vang thuin hle a, sorkarna chelh tawh zingah phei chuan infak leh inchawimawi tawn sawi tur an awm meuh lo. Sorkar hnuhnung apiangin sorkar hmasa political party te kihhnawk an thian mawlh mawlh zel a ni ber mai. Ngaihdan a inan vek loh avangin kihhnawk tia sawi hi thil awm thei tak pawh niin a lang. Politician zingah mimal infak sawi tur erawh chu hriattur an awm ve bawk a, chu pawh chu a tam lem lo.Kan hriattheih lar tham hnai vai chu Congress-in sorkarna an lak hnu lawka Chief Minister Pu Lal Thanhawla’n MNF kaihhruai sorkar tla taa Assembly Speaker Pu Lalchamliana a fakna kha a ni awm e. Assembly House a kaihhruai danah Mizoram Assembly Speaker zinga tha ber nia a ngaih thu a sawi a nih kha. Party President te phei chuan mimal tak pawha beih an tawk duh bik niin a lang.
Infakna hian mi a tiphura, hmalakna kawng tam takah chakna thahruai a ni thei a ni. Amaherawhchu infakna hian mahni nihna diktak min hai tir ve thei tho mai, infakna zawng zawng a dik ziktluak fo loh avangin, infakna tam tak chuan mit a tidela, mi a hruaisual ve thei a ni.
Thil tha zawk a thlen theih beiseina avanga sawiseltu nih theih a pawimawh hle a ni. Hei hi Assembly House chhungah a takin kan hmu thin awm e. Eptu lam thutna siam a ni a, chuta thu te chuan sorkar kallai khalh ngil turin sorkar inrelbawl dan leh thil tih danah a dik lo leh fel tawk lo lai nia an hriat te an au chhuahpui thin a, dik leh fimkhur zawka kal turin sorkar an nawr thin a ni. Hei hian a tul huna sawiseltute dinhmun pawimawhzia a tilang chiang viau awm e.
Tunlai hian Mizorama opposition party te’n Ruling party sorkar kalpui dan leh hmalakna sawiselin an duhkhawplohnate an au chhuahpui hlawm a, Heng sawiselna te hi Ruling Party chuan inenfiah nan hmang hlauh sela, atangkai hle dawn a ni.
Insawiselna leh induhkhawplohna chungchangah mi thenkhat chuan insawifiah an tum fo thin. Sorkar kalphungah ngat phei chuan sorkar kal zel danah a dik chu a lo lang fiah tho tho mai a, chuvangin thusawi leh ziak hmanga insawifiah emaw ai chuan thil dik leh tha chu chetzia leh hmalakna hmanga lantir mai hi mipui-te tan hriat thiam a nuam ber a ni. Chuvangin insawiselna te hi hmang tangkai thei turin rilru zau tak pu ila kan zavaia tan hmasawnna pawimawh tak a ni ngei ang.