CHAPCHAR KUT HMAN DAN A PAWIMAWH

Mizo te hian kan hnam zia rang pholanna atana Chapchâr Kût kan hman ţhin dan chungchang-ah ngaihdan hrang hrang a awm a. Thenkhat chuan kan pi leh pu te hunlaia Chapchâr Kût an hman dan dik tak phaw chhuak thei ang bera hman an duhlaiin, Mizo hnam ziarâng leh lam hrim him pholanna hun remchanga hman duh pawl awm a ni bawk, heibak ah hian thenkhat chuan cultural exchange anga kalpuia, hnamdang te pawhin an hnam ziarâng an rawn pho lan ve theih nana hman te pawh pawi ti lovin, ram chhung hnam hrang hrang inpumkhatna atana hman thain an ring bawk a, an phalzau hle a ni.
Hnam ziarang leh kalphung hi khawvel hmasawn zelah a danglam hret hret veka, hei pawh hi ţhenkhat tan chuan hriatthiam a har a, nimahsela hun in a her chhuahpui tho tho si a; hetiang thleng pawha kan hriatthiam theihna tur atan a inzirtirna kan mamawh a ni. Mizoram chu kan vannei a, tlawmngaipawl tha tak tak kan nei a, heng te nêna ţang ho pawh hian khua leh veng tin-ah khawtlang nun danglam chho hrula culture vawnhim dan inzirtir theih a ni. Kan pi leh pute hunlaia tih ngai loh, Chapchar Kût-ah khuallian te pawh kan nei ta zel a, tumahin kan sawisêl hran lo, chutiang zêlin thil dang pawh a ţul chuan her rem hret hret a ngai thei a ni. Art and Culture Deptt hemi kawngah hian mawh an phur zual a, anni hian Kristian sakhaw ti hmêl hem lova Mizoculture vawn him theih dan an dap a ţul a, seminar leh workshop te pawh a tam thei ang buatsaihin, a ţul chuan research thlengin tih inhuam sela thil tangkai tak a ni ngei ang.
Intih changkanna vanga Mizo hnam ze hlauh zawnga khawsa an awm fo. Mizo lam leh inchei zahpui te pawh an awm a ni awm e. Mahni hnam lam leh zai dah hniama, hnam dang lam leh zai chawi vul zawk kan awm a ni mai thei, hnam dang zai leh lam pawh kan thiam chu a sual love, kan inchei danah pawh a hun leh hmun a zirin a Mizo reng thei kher lovang, a hriatthiamawm a, Mizo incheia inchei reng turin intihluih chi pawh a ni chuang love. Nimahsela kan hriat reng tur chu Khawvela Mizo te hlutna ber chu, hnam pakhat, culture leh tradition hran neia kan awm ve tlat hi a ni. Kan hnam zaį leh lâm-ah te hi chuan khawvelah a ber kan ni kum khua dawn, a neitu kan nih miau avangin. Kan hnam inchei leh lam te hi kan hnam ro hlu, khawvel hmundanga an neihve theih loh a ni, hnamdangin nei vein lo ti pawh ni sela, Mizo tih ang ti ve, Mizo tih ang zir ve an ni chauh dawn a, Mizote hi chu a tak tak, ‘original’ kan nih tlat reng dawn a, chuvangin khawvel hmuhah mawi taka kan pho lan thiam a tul deuh deuh dawn a, Chapchar Kut hi chumi atana hun remchang tak chu a ni a, tangkai taka kan hman chhoh zel a pawimawh dawn a ni.