MIZORAMA TLAWMNGAI PAWL TE LEH POLITICS

Mizoramah hian tlawmngai pawl lian tak tak kan nei a, chung zingah chuan YMA, MHIP leh MUP te hi a langsâr zual an ni awm e, chhim lamah ţhalai pawl lian tak tak an awm bawk a. Heng kan tlawmngai pawl te hi ram leh hnam hmasawnna tur te, sorkar khalh ngila thawhpui turte leh Mizo hnam ziarâng chhawm nunga humhalhna kawngah ta an tangkaiin an pawimawh em em a ni. Sorkar pawh hian a ti lutuk em tih theih khawpin tlawmngai pawl kan neih te hi committee peng hrang hrang leh programme tam takah hian a telh ţhin a, scheme ţhenkhat-ah phei chuan tlawmngai pawlte tel lo hian sorkar tan chak taka hma lak a har a, thawhhona thuthlung hial te siamin tlawmngai pawl kutah thui tak a innghat fo a ni.

Kan politician langsar zingah hian Mizorama Tlawmngai Pawl hruaitu hlui an awm nual a ni. Tlawmngai pawl lian hruaitu te hi miţha leh tlinga ngaih an nih avangin, political party te hian an mi leh sa atan an duh a, an sâwm thlu-ah ngai ila, ram hruaina hna thawk tlâk an ni tihna a ni a, thil lawmawm tak a ni  kan ti thei ang. Chutih rualin thlirna dang a awm thei a, kan tlawmngai pawl liante hi  politics-a dinhmun ţha luah theihna tura hmanrua, political institution -ah miin an ngai thei ve thung a ni. Hetiang hi a nih chuan Pawl din chhan leh tum hlam chhiahin Politics-a hamţhatna ûmin Tlawmngai Pawl-te hi an hman ţangkai theih dawn a, kan tlawmngai pawl neih, ţangkai leh chhuan em em te hi  politics kailâwn ţangkai tak, political institution-ah kan chhuah anga, political party te’n an zuam hle anga, an thil tum leh din chhan ngahtuahpui hauh lovin an party hamţhatna tur ûmin hmanruaah an hmang mai thei dawn a ni.

Mizoram chhunga Tlawmngai Pawl te hi an chhuanawm hle a, amaherawh chu thawkkhatlai aţang khan political party te hian an inbelhbul siak emaw tih tur a ni. Tlawmngai Pawl hruaitute lam ai mahin political party lam hian an hamţhatna hmuh beiseiin an rîm ţhin a ni zawk mai thei. Political party inbeihna leh inchirhthehna kârah hian tlawmngai pawl tan chuan fimkhur a ngai ta hle tih hai rual a ni lo.

Hetiang karah hian Tlawmngai Pawl kan neih, kan chhuan em em leh ţangkai tak tak te hi an inven fimkur a ngai leh zual ta a ni. Kan Tlawmngai Pawl ţha tak tak hruaitute hi, tih bik political party leh tih bik Kohhran nei hauh lovin, dinhmun pawimawh takah dingin, ram leh hnam hruaitu te an nisa reng tawh a ni. Amaherawhchu  miţha leh tling tawka ngaih an nih avangin political party te hian an huang chung aţanga ram leh hnam hruaihna thawk turin an ît thei a, an party tihmingţha tur leh tiphuisui turin an duh thei bawk. Hetiang hi thil awm thei a ni a, indem theih pawh niin a lang lo. Amaherawhchu hetih lai hian miin politics khelh a duh vanga Tlawmngai Pawl hruaitu nihna a chuh vaih erawh chuan chu  Tlawmngai Pawl chu Politics hmanruaah a chhuah tihna a ni ang. Tunhnuah hian  Tlawmngai Pawla nihna inchuh thâwm mawi lo tak tak hriat tur a awm ta fo mai. Hei hian kan Tlawmngai Pawl ţhenkhata hruaitu dinhmun te hi political party-a dinhmun ţha luah theihna tura kailawn remchang-ah ngaiin an chuh ta mai em ni ang, tih a ngaihtuah theih a ni. Tlawmngai Pawl inthlanna mah nise, mimalin sum tam tak sên an inhuam ţhin nia sawi a ni. Hetiang hi a nih chuan, Mizo ţawnga ‘Tlawmngai Pawl’ tia kan kohduatna hi an pu zo lo anga, mahni ţânghma hai inhâwrkhawm ang lekah miin an ngai ang tih a hlauhawm a ni.

Kan Tlawmngai Pawl te hian Mizoramah dinhmun pawimawh tak an luah reng a, mawhphurhna pawh an nei lian a, mipui pawhin kan ring a ni. Chuvangin kan Tlawmngai Pawlte hian Tlawmngai Pawl an nihna hi ţha tak leh zahawm takin vawng nung reng sela, political party te inrawlhna lakah fihlim deuh deuh turin inveng thiam sela, tichuan Mizoram mipui tana  tlawmngai pawl huang atanga an tangkai thehna kawngah  an chhenfâkawm reng thei ang.