THUDIK leh POLITICS

Thu dik ţan a, dâwt hnâwl tum lo, mahni awmna party sûkthlêk zawng a nih vânga thu dik leh dâwt  pawh sawi thei lo, party âtchilh  mi engemaw zât kan awm ti ila kan sawi sual kher lovang. An party hruaitute’n an tih a piang chu finfiah chuang lova au chhuah pui nghâl bawrh bawrh pawl, mahni party sawi dân anih  tawh phawt chuan a dik a dawk thlu lova ţang tlat kan tam a, mahni party tâna mirinawm leh huaisen niin kan inngai a, amaherawhchu ram leh hnam hmêlma, ram politics tibawlhhlawhtu te zing ami kan ni mah zâwk a ni.

Political party zawng zawng hian thubelhchian dawllo hnâwl ngam, Dikna chawisângtu kan mamawh vek a, kan dinhmun en hian chutiang mi chu  kan mamawh Thubelhchian dawllo thup tur chuan a aia thil ţha lo zawk rawih a ţul ţhin a ni. Chuvangin thubelhchian dawllo hmanga politics khelh hi bânsan ila, kan nihna leh dinhmun dik tak hi pholang ila, kan tih ţhat kan tlângzarh lai hian kan dai pelh lai leh a siam ţhat hna pawh pho lang ngam tel ila, chu chu mipuiin an ngaisâng em em a ni.

Thuneihna leh rorelna fawng vuan turin  hmanrua atan thu dik chauh hmang ila, chutiang bawkin Rorelna changtuten thuneihna chelh zui duhvangin hmanrua atan thu dik chauh an hman a ţûl a ni. Politics thu veivir-ah thudiklo chu a nihna diktaka a lan chhuah zêl theih nân, kan politician te’n  an mawh phurhna an hriat a ngai a ni. Chutih laiin  mipuite pawhin thubelh chian dawllo chu langsâr takin hnâwl ngam ila, political party thliar hauhlova Thudik kan ţan tlat chuan, thubelhchian dâwl lo hmanga politics khelh hi a ziawm chho ngei ang. 

Mipui te pawhin thubelhchian dâwllo leh Dâwt vâr tia kan sawi te hi politics khelhna atâna hmanraw pakhatah kan pawm a nih ngat chuan, kan hnam kalphung a chhe thûk hle tihna a ni ang. 

KOHHRAN LEH MLTP ACT

Kohhran te’n MLTP Act kalpui zel an duh laia thil pakhat ngaihtuah chian ngai ta chu, Study Group te’n ‘MLTP Act hlawhtlin lohna chhan lian ber zinga Zu duhna leh mamawhna a nasat vang nia an sawi leh Zu mamawhna titlêm tura hmalâkna a tlem’ tih hi a ni. 

MLTP Act hi a hlawhtling tawk lo kan tih chuan a hlawhtlin tawklohna chhanah Kohhran hian mawh a lo phur sang viau a ni mai thei. Zu mamawhna titlêm tur hian hma lakna kawng hrang hrang a awm thei ang. Kristian zingah chuan sakhuana lama kan inzirtirna aţanga hmalakna hi kan hmachhuan ber leh a ki pui ber a ni. Biak Ina lawi pha chinte inzirtirna hi chu kan kalpui vek hlawm a, amaherawhchu, Zu mamawhtu, a lova awm thei lo, zu ngawlveite chhan chhuak tura kohhran hmalâkna hi chhuan tham a awm meuh em ? Mi tlêm te, mi thahnemngaite thawhkhawma enkawl Home-ah te hian kan innghat mai a ni lo maw tih hi chhût tham a ni. Biak In ropui tak tak sak nâna kan sum sên te, kohhran hmunhma tihchangtlunna tura sum leh thâ kan sên te, inkhâwmpuina a sum kan hman zo zaite hi a tam viau mai, chutih lain  Zu vanga harsatna tâwk, Zu bawiha tang te leh rahbi tleu vanga hmeithai zu zuar dawmkân ngai, Setana’n tisa leh thlaraua a  phuarna aţanga chhan chhuak tura sum leh thâ kan sên te hi a tlêm deuh a ni, ti ila kan daw awm love. 

 MLTP Act zirchianna hian Kohhran te hi  tiharh tel sela, sorkar-ah kan bel ngawt thei lo,  kan rawngbawlna theuh kan bih chian a ngai  tih hi a pho lang tel a ni. Zu ngawlvei  leh Zu zawrhna bawiha tangte chhan chhuak tur hian awmze nei tham Budget kan dah ve phal em ? Nge  a khap turin  sorkar kan ngên leh ringawt dawn em ni ? Aizawl veng pakhata kohhran chuan hman deuh khan an kohhran chhunga zu zuara eizawng te eizawnna  thlâk sak nan, tanpuina sum an pe a ni. 

MLTP Act hi hman zui a ni emaw, hlih a ni emaw Zu duhna leh mamawhna a sâng tih hi zir chhuah a nih hrim hrim avangin,  Dân hmanga inhuahkhirhna lam aiin mamawh lo tura inzirtirna a pawimawh hle tihna a ni a, kohhran mawhphurhna a sang  viau a ni.